Mbajtja e dietës së shëndetshme në kohën e shtatzënisë është me rëndësi të madhe, sepse tani e tutje do të hani për të dy! Gjatë kësaj kohe trupi Juaj ka nevojë për lëndë ushqimore shtesë, vitamina dhe minerale.
Por kjo nuk është justifikim që ju të ngopeni me çokollatë dhe karamele! Shprehitë e këqija ushqimore dhe mbipesha mund të shtojnë rrezikun e zhvillimit të diabetit gestacional, të ndërlikimeve në kohën e shtatzënisë ose lindjes dhe madje të ndikojnë negativisht në zhvillimin e fetusit. Prandaj, zgjedhja e një diete të shëndetshme dhe me vlerë të lartë ushqyese gjatë shtatzënisë është me rëndësi të madhe si për Ju, ashtu edhe për foshnjën Tuaj.
Nëse dëshironi të përmirësoni shprehitë tuaja të të ushqyerit në kohën e shtatzënisë, lexojeni tekstin e mëposhtëm!
Perimet e gjelbra
Brokoli dhe perimet me ngjyrë të gjelbër të errët si lakra dhe spinaqi, përmbajnë shumë prej lëndëve ushqyese që janë të nevojshme për gratë shtatzëna. Ato janë të pasura me fibra, vitaminën C, vitaminën K, vitaminën A, kalciumin, hekurin, acidin folik, kaliumin dhe janë të pasura me antioksidantë. Përveç kësaj ato përmbajnë përzierje bimore që ndihmojnë sistemin imunitar dhe tretjen.
Për shkak të përmbajtjes së lartë të fibrave, këto perime mund të ndihmojnë për parandalimin e kapsllëkut, i cili është një simptomë e zakonshme për gratë shtatzëna.
Përmbajtja e lartë e vitaminës C në këto perime me ngjyrë të gjelbër të errët e ndihmojnë trupin të absorbojë përmbajtjen e hekurit, kur është kombinuar me ushqime të pasura me hekur si makaronat integrale ose orizi ngjyrë kafe.
Salmoni i egjër
Salmoni është i pasur me acidet e pazëvendësueshme yndyrore Omega-3. Një pjesë e madhe e njerëzve, veçanërisht gratë shtatzëna, nuk marrin sasinë e duhur të Omega-3.
Acidet yndyrore poli të pangopura Omega-3 me zinxhir të gjatë DHA (acidi dokosaheksaenoik) dhe EPA (acidi eikosapentaenoik) janë veçanërisht të rëndësishme për një varg arsyesh:
- trupi nuk mund t’i prodhojë vetë
- ndihmojnë në metabolizmin e vitaminave të tretshme në yndyrë si A dhe E.
- mund të ndihmojnë për uljen e rrezikut të depresionit prenatal
- ato janë me rëndësi vendimtare për zhvillimin e syve dhe trurit të foshnjës Suaj ( si truri, ashtu dhe retina janë ndërtuar kryesisht prej DHA)
- përveç kësaj janë një burim i mirë i jodit.
Shqetësoheni se peshqit përmbajnë shumë merkur? Salmoni është një zgjedhje e sigurt. Madje rekomandohet ta hani 2-3 herë në javë. Sardelet dhe harengat gjithashtu janë një variant i mirë për gratë shtatzëna.
Bulmetrat
Kalciumi është i nevojshëm për ndërtimin e drejtë të kockave të foshnjës Suaj. Përveç kësaj, si grua shtatzënë, Ju gjithashtu keni nevojë për më shumë kalcium në dietën tuaj për të mbajtur kockat Tuaja të shëndetshme dhe për të ndihmuar punën e nervave dhe muskujve. Ja për se dieta Juaj duhet të përfshijë proteina dhe kalcium shtesë, për të ndihmuar ndryshimet në trupin Tuaj dhe zhvillimin e foshnjës Suaj.
Kosi është i dobishëm për gratë shtatzëna, sepse përmban më shumë kalcium se bulmetrat e tjera. Diçka më tepër, disa lloje përmbajnë dhe baktere probiotike, të cilat ndihmojnë tretjen.
Gratë me intolerancë ndaj laktozës gjithashtu mund të provojnë kos probiotik.
Shtesat ushqimore probiotike në kohën e shtatzënisë gjithashtu mund të pakësojnë rrezikun e ndërlikimeve si preeklampsia, diabeti gestacional, infeksionet vaginale dhe madje disa alergji. Kini parasysh, se marrja e probiotikëve gjatë shtatzënisë nuk është gjithmonë e sigurt, prandaj konsultohuni me mjekun Tuaj përpara se t’i merrni.
Vezët
Vezët janë ndër produktet me vlerën më të lartë ushqyese në planet! Një vezë e madhe përmban 77 kalori dhe është e pasur me proteina dhe yndyrë. Ajo përmban dhe shumë vitamina dhe minerale të shëndetshme.
Përveç kësaj, vezët janë një burim i shkëlqyeshëm i kolinës. Kolina është me rëndësi thelbësore për shumë procese në trupin e njeriut dhe për zhvillimin e trurit. Marrja e pamjaftueshme e kolinës në kohën e shtatzënisë mund të rritë rrezikun e defekteve të tubit nervor dhe eventualisht të çojë në uljen e funksionit të trurit të fetusit.
Diçka më tepër, një vezë e plotë përmban përafërsisht 113 mg kolinë, që përbën rreth 25% prej sasisë së rekomanduar ditore për gratë shtatzëna.
Vezët janë një burim i mirë i vitaminës D. Ajo ndihmon kalciumin në ndërtimin e kockave dhe dhëmbëve të shëndetshëm për foshnjën Tuaj dhe e mban sistemin Tuaj imunitar në formë të mirë. Përveç kësaj vitamina D mund të zvogëlojë rrezikun e diabetit gestacional, preeklampsisë dhe peshës së ulët gjatë lindjes.
Mishi i pastër
Mishi i viçit dhe i pulës janë burime të mira të proteinave me cilësi të lartë. Mishi i viçit është i pasur me hekur, kolinë dhe vitamina të tjera të grupit B, të cilat janë të nevojshme në sasi më të mëdha gjatë shtatzënisë.
Aminoacidet në proteinat janë elementet ndërtuese të çdo qelize si në rupit Tuaj, ashtu edhe në trupin e foshnjës Suaj. Ushqimet me përmbajtje të lartë të proteinave zvogëlojnë ndjenjën e urisë dhe stabilizojnë sheqerin në gjak.
Përveç përmbajtjes së lartë të proteinave, mishi është i pasur me hekur, i cili është me rëndësi vendimtare për zhvillimin e qelizave të kuqe: Tuajat dhe të foshnjës Suaj! Përveç kësaj, hekuri luan rol të rëndësishëm edhe në zhvillimin e trurit të fetusit.
Prandaj, mishi i pastër është një prej ushqimeve më të mira gjatë shtatzënisë.
Bishtajoret
Bishtajoret përfshijnë thjerrëzat, bizelet, fasulet, qiqrat, sojën dhe kikirikët. Ato janë një burim i shkëlqyeshëm bimor i fibrave, proteinave, hekurit, acidit folik (vitamina B9) dhe kalciumit – të gjitha këto janë përbërës të rëndësishëm për periudhën e shtatzënisë !
Folati është një prej vitaminave të grupit B (vitamina B9) dhe është i rëndësishëm për shëndetin e nënës dhe të fetusit sidomos gjatë trimestrit të parë. Deficiti i acidit folik lidhet me një rrezik më të madh të defekteve të tubit nervor dhe peshë më të ulët të fetusit në lindje. Marrja e pamjaftueshme e acidit folik gjithashtu mund ta bëjë fëmijën tuaj më të ekspozuar ndaj infeksioneve dhe sëmundjeve në një etapë më të vonshme.
Bishtajoret përmbajnë sasi të mëdha të acidit folik. Një filxhan me thjerrëza, qiqra ose fasule të zeza mund të sigurojnë nga 65% deri në 90% të konsumit të rekomanduar ditor. Përveç kësaj, bishtajoret janë të pasura me fibra. Disa varietete janë gjithashtu të pasura me hekur, magnez dhe kalium.
Përveç me ushqimin, është me rëndësi që acidi folik (vitamina B9) të merret suplementarisht nën formën e shtesës për të shmangur deficitin!
Nëse doni të mësoni më shumë fakte interesante rreth fekondimit, shtatzënisë dhe asaj që vjen më pas, shikoni blogjet tona më të fundit!
